NorskEnglish 
Čálit!
 
Ođđašamanisma

Maŋemus 50 jagi šamanisma lea ožžon ođđa máhtajeaddjiid birra máilmmi. Máŋggas leat ohcalan šamanisttalaš oskku nu ahte oččošedje návccaid oažžut oktavuođa eará dovdamušmáilmmiin dan dihtii ahte einnostit dahje guvhlláruššat.

Beassan dihtii eará dovdamušdillái de geavahuvvo erenoamážit goavddis, muhto maiddái dánsun, lávlun ja eará vuogit. Muhtumat leat maiddái geavahan gárren-gaskaomiid vai ožžot dan effeavtta man háliidit.

Maiddái sámi šamanisma lea ožžon ođđa geavaheaddjiid. Sámi ođđašamanismma vuođđun lea dološ oskku máhttu. Digaštallojuvvo ahte lea go dán ođđašamanismma vuođđu ovdalkristtalaš sámi osku. Leat vássán ollu jagit dan rájes go noaiddit noidošedje siidaservodagas ja gitta eaŋkilpersovnnaide geat bálvalit sámi šamanismma otne.

Sii geat bálvalit sámi ođđašamanismma, gal oaivvildit ahte sii ohcalit fámu mii álo lea leamaš, ja ahte dat čatná sii áigadas árbevirrui. Muhtumat čujuhit sogalašvuođa namahuvvon noiddiide geat elle ovdalkirsttalaš áigge.

Gáldut:
Pollan, Brita, 1993: Samiske sjamaner.
Erikson, Jörgen I., 1988: Samisk shamanism.
 
Govva/Foto: Mihkku Solbakk